16 juillet 2017

Ameɣnas seg imezwura

Illa yiwen isem-is Dda Salem, deg iseggasen n settin, d ameɣnas ameqqran imi d akken iqeddec s nnig wiyiḍ. Yeqdec, yelḥa, yuzzel, yaɛteb tarwiḥt-is armi dayen kan iwakken tamazight ak d imawlan-is ad ifak fell-asen lhemm i d-yesseɣli uḍabu n waɛraben-awal seg asmi i teffeɣ Fransa i 62. Deg talit n Bumedyen, iqvailyen d imaziɣen sumata ddren ak d lbaṭel d ddel n tutlayt deg iseggasen n 60/70. Dinna in faq belli nettwakellex am akken neqqar yagi deg umedya s tutlayt nneɣ : »srewteɣ ɛabban wiyaḍ ! ». Aɛraven-awal yellan zik ṭṭaqa ddan d stiɛmaṛ afransis, asmi is-qqaren : »d acu i yeblan iqbayeliyen ak d irumyen ?  » Iqvayliyen lhan ad ssufɣen aberrani, nutni ttheggin-d iman-nsen ak d icerqiyen akken ad rren azaglu nniḍen, win n stiɛmar n tutlayt taɛrabt fi srekben ddin n tneslemt.

Asmi tefra, ẓedmen-d fell-aɣ s ufus n Fransa ak d Maṣer; ṭṭfen aḍabu u bdan lla d-ttruẓen deg tjaddit d ttutlayt n tmurt. Ihi, ikker-d Si lḥucin ad « ikkes lbaṭṭel » af Iqvayliyen, maca netta ilha-d d wayen nniḍen, ayen it-yaɛnan gar-as ak d Ben Bella.

Muḥend Aɛrav ababat n Wegraw Imaziɣen, yedda deg uḥemmal n tkellax n ukabar F.F.S i d-yexleq Si lḥucin. Asmi yexser ukabar n Si lḥucin, acku isendemm-it Bussuf*, inna-yas : »kecc d agrawal* meqqeren, mačči d amalway aɣelnaw n yiwet n tama kan tmurt ». Si Lḥucin din yumen-it, imaren tanekra tefreq, tenegzi « , imi ur yella ara d mmazeɣ, iqbel yumen axeddaɛ n Bussuf. Dinna is-yugi ad yekcem i Krim Velqcem ar ukabar n F.F.S, dayen id sebba armi iqvayliyen bḍan af sin iḥricen, netta yuɣ lḥal d ayen ittnadin icenga akken ad aɣ-rren ddawa n stiɛamer « uqendur ». Segmiren, yexser F.F.S, u Muḥend Aɛrav izger-d ar Fransa anida i d-islul netta ak d wiyaḍ (Tawes Amruc, Ḥanuz, Reḥmani, atg…) Agraw Imaziɣen-agi ɣef ara d-yemmeslay Salem At Sliman (at idekkeṛ Yillu s lxir isseɣzef-as tudert). D wagi i d amsawal* n weɣmis Iẓuran ak d umeɣnas n Wegraw Imaziɣen. Hatay d acu i d-yenna:

Iẓuran: Amek i tkecmeḍ ar Wegraw Imaziɣen ?

Salem: – Di 1962, ruḥeɣ ad xedmeɣ di Fransa. Xedmeɣ deg lebni. 1967, walaɣ yiwen unazal* yelseq deg lḥiḍ n llemri n yiwet n lqahwa n Uqvayli, mi i d-uɣaleɣ deg ssuq n wass n ssebt. Anazal agi d win n wegraw Imaziɣen, yessawal i tmeɣra ara d-iḍrun deg ussan n umalas*. Nniɣ i yiman-iw : « Ahya a siɛqa ! Taluft agi taɛna-yi, yak ula d nekk d amaziɣ ! ». Akka i d-fiɣ iman-iw deg uxxam n imaziɣen id yusan di 05 rue d’Uzes di Lpari 2em, d ass n lḥed.

Iẓuran: Ma tesliḍ af Ugraw Imaziɣen qbel anazal-agi?|

Salem: Mdah, ur sliɣ ara deg dunnit-iw qbel akkin-a ! Mi wwḍeɣ ar din ur ssineɣ yiwen, ula d Bessaoud Muḥend Aɛrav. Xilla n imanagen ttasen-d ar dinna, wa ikeččem wa itteffeɣ.

Iẓuran: Amek ittwaxdem leqdic nwen dinna deg Ugraw Imaziɣen, tella tegmatt, illa iswaɣ* ?

Salem: Aṭṭas n terziwin, lɣaci iga ttaburgna n iweḍfen. Γur-neɣ tamacint n tira ak d la ronéo njebbed yis les tractes ak d iɣmisen. Iswaɣ* igerrez xas akken yeggwet unekcum d tufɣa. Muḥend Aɛrav, yennulfa-d d amanaw*, ittak-aɣ-d, isɣaray-aɣ amezruy n Imaziɣen, si Nat Muḥend* ar Ibn Tacfin terreḍ akk-in ar Kahina d Qusila. Segimiren i nessen Ibn Khaldun d Charles André Julien akk meṛṛa imeqranen yettwasnen deg umezruy; Qbel werǧin nesla i wanecta. Muḥend Aɛrav yesɣaray-aɣ s tira n tifinaɣ akken ad yemmel i yemdanen belli lejdud nneɣ ɣur-sen tira acḥal n lleqrun uya. Acku ṭṭaqa seg wid i d-yettasen, ɛudden tameslayt-nsen ur tettaru ara. Agraw Imaziɣen yesfaq-d aṭṭas n yemdanen af tjaddit-nsen, ma yella ukin-d ass-agi. S Wegraw Imaziɣen i si tettwassen taluft nneɣ deg dunnit, si Niger ar Lčad terreḍ ar Lmali d Tunes. Llan ula d Ilibyanen d Itunisyen i d-yettasen ula d nutni. Muqlet kan d acu yettwaxedmen ass-a di Lmerruk. Agraw Imaziɣen yuɣal d amkan anida ula d icumuren ttɣman din kra yekka wass.

Amawal
Amalway: leader
Aɣelnaw: national
Tenegzi: échouée
Mmazeɣ: berbériste
Amsawal : interview
Unazal: affiche
Umalas: semaines
Iswaɣ: ambiance
Amanaw: conférencier
Nat Muḥend: les Almoḥads

Soyez le premier à commenter

Laisser un commentaire

Votre adresse de messagerie ne sera pas publiée.


*


UA-10888605-2