24 avril 2017

Iles n tyemmatt

Tessader* allen-is ɣef akal
Tedla* af uruz-is yerka
Ljedra-s i s-d-tkeffu awal
Tečča-as-tt akk twekka*
Tettxemmim-as i yimal*
Amek ara t-teqqabel azekka
Tuggad ad tt-yeglu uḥemmal*
Win ineqḍen* tirrugza
I warraw-is tessawal
Ur asen-teǧǧi tuzzma*

Ttxilt-wat wi ad iyi yallen
Ad d-yessemsed allen
Ad ten-iheggi imeṭṭi
Aḥemmal i d-ineɣlen
Ur yezgil yiwen
Tarwa-w yeddem-iten zzat-i
Greɣ-d ger irejjaqen
Deg-i lla hemmjen*
Armi iyi-sewwen adeddi*
Iban wayen iten-yuɣen
Teḍra-asen am ibawen (01)
Γef lluḥ yal wa anida yeɣli
Ur d-mmektan yemmat-sen (02)
Tin akken i ten-id issekren
Ttun akk laɛtab nni
Amer llin d irgazen
Γef yiles-is ad azzlen (03)
Ad d-seffin ayeddid* nni
Asmi irgazen ṛuḥen
Wid d-yeqqimen
D uffal yegman di tilli (04)

Am ass-agi ad d-tbin tafat
Ad tezzuzef fell-am iḍ
Ad am-d-taɣ am tcemmaɛt
S tmes-is ara d-ttwaliḍ
Tafat-is ur tettmettat
Yerna ur d-berru i nnfiḍ

Amawal
Tessader : v. baisser, descendre, vient de ader. (i Vgayet qqaren ad ṭṭreɣ)
Tedla : v. dlu, idla, retrouver, mettre la main,…
Twekka : n fem p. vermine
yimal : n m s. futur, avenir.
uḥemmal : n m s. torrent
ineqden : v nqed, contrôler, envisager, prévenir
tuzzma : n f s. blâme, reproche
hemmjen : γ hmej : mordre à pleine dents.
ideddi : n m s. plaie
ayeddid : n m s. récipient pour liquide en peu de bête.
uffal : n m s. plante dont le bois est très fragile, cassant, sans aucune résistance.
(cette plante est prise souvent pour exemple pour sa fragilité : « uffal ur ittqaval uzzal »).

Lemɛani deg awal :
01) Am ibawen ɣef lluḥ : ayen ur ddukel ara, yefreq yal wa anida yerra.
02) Ur d-mmektan yemmat-sen… : wid i nekkren tajaddit (renégats)
03) Γef yiles-is ad azzlen : ddeqs ttazzlen ɣef uaddis-nsen iten-iceggγen.
04) D uffal* yegman di tilli : amedya agi qqarent i wayen ur nettaṭaf ara u ulac deg-s kra n nnfaɛ.

Expression du jour :
« Iṭij n meɣres yessivrik iɣes ».

*Asefru yagi sɣur Massa Kahina Ḥiṛec. Tura-t-id deg umis iẓuran n 9 furar- 2000.