22 avril 2017

Izem d inebgawen-is

Yiwen wass izem inced-d imeddukal-is, deg-sen illa weɣyul, uccen d uvaṛaɣ* ɣer yefri* illan d tamezduɣt-ines. Vdan ttmeslayen gara-sen, awal yettawi-d wayeḍ armi i d-wwḍen ar uxxam n yizem. Dɣa yesseqsa-ten yizem amek, d acu i walan deg uxxam-is. Isseqsa amezwaru deg inebgawen nni, inna :
- Izem : Kečč ay aɣyul d acu i twalaḍ ?

Irra-yas weɣyul :-Axxam-ik ilha xas akka d ifri, ur tettḥulfuḍ deg-s i wsemmiḍ deg tegrest neɣ i weẓɣal deg unebdu. D acu kan txuṣ-it tabenda* n ijeǧǧigen imi yettraḥ d imurḍusen nni i tetteḍ.

Izem yerra-as-id :-Yaaah ! D axxam am wagi i yettfuḥen d imurḍusen ! Yezzi ar ɣer-s,yewwet-it, yenɣa-t. Imuqel ɣer wuccen, yerra-as :
- Ay izem ay agellid n tẓegi, axxam-ik ittriḥ d tafenda n ijeǧǧen n tefsut. Leḥyuḍ-is ttemsirqin am tafat n yiṭij.

Izem yerra-as : -avudu am wagi teqqareḍ iyi-d d ṣraya, yecveḥ yernu zeddig ?! Idewwer ar wuccen, yewwet-it yenɣa-t. Idewwer ar ubaṛaɣ inna-as ula i netta : -I kečč ay abaṛaɣ, acuɣer akka i teggugmeḍ. Ini-yi-d d acu i twalaḍ ?

Abaṛaɣ iwala iman-is deg tcebbakt, ur yelli wamek ara isellek iman-is. Ixemmem kra kan irra-as i yizem :-Suref-iyi ay izem, ass agi ur zmireɣ ara a k-iniɣ d acu i walaɣ, allen-iw ttemcullaɛent wallen-iw acku yewwet-iyi waḍu*, ur zmireɣ ara ad sriḥeɣ neɣ ad waliɣ. Yerra iman-is metwal n tuffɣa n yefri kan iẓelkeḍ ikcem ar teẓgi.