22 juin 2017

Izem d ubareɣ*

Illa yizem, wesser dayen; ur yezmir ara ula i yiwen n lweḥc. Asmi i iwala iman-is dayen, yewqem yiwet n tḥilett akken ad yidir yis-s. Ihi, amek ara yexdem? Iruḥ, yekcem ar yiwen n yifri*, yeqqim daxel-is. Imir, win d-yusan ar ɣur-s seg leḥwuc ad t-iẓer, dɣa ad t-yečč. Akken kan alarmi d yiwen wass, atah yusa-d ɣur-s ubareɣ ad t-izur*. Abareɣ-nni, yiwweḍ ɣer zdat n tewwurt n yifri, isellem ɣef yizem, yenna:Retour ligne manuel
– Amek telliḍ ay agellid n lewḥuc ?
Izem yerra-as:
– Acuɣer aɛni akkagi i tgummaḍ ad d-tkecmeḍ ay abareɣ ?
Abareɣ ula d netta yerra-as:
– Ay agellid n lewḥuc… lliɣ bɣiɣ ad n-kecmeɣ, yuɣal walaɣ lateṛ* n unekcum yella, ma d win n tuffɣa ulac ; imiren ndemmeɣ.

Amawal:
abareɣ, tabareɣt: renard
ifri: grotte
lateṛ: traces de pas
Taɣara: morale
tiḥraymit: ruse, tromperie
iẓwer: être dynamique
bu-sin iḍarren: être humain, mot tourné en dérision.
imezgiyen: obstacles

Taɣara:
Lmɛana-s taqsiḍt agi meḥsub, ilaq deg ddunit, ad yettmuqul umdan anida ara yeggar iḍarren-is. Deg tallit ideg nella, medden akken ma llan ḥercen, ččuren d tiḥraymit*. Ilaq ihi, i wakken ad isellek iman-is umdan, tewwi-as-id ad iẓwer*, ma yebɣa ad yidir, ad imnaɛ tarwiḥit-is. Ihi, tadyant n yizem d ubareɣ, ad yecfu fell-as bu-sin iḍarren akken ur t-yekkat ara uzaylal mi ara yemmager imezgiyen* deg tmurt-ines.

UA-10888605-2