22 juin 2017

Nesla s imaziɣen

Nesla s imaziɣen mi msawalen
Acelḥi issawel iw Ucawi tura myaɛqalen
Aqvayli si zik yuki yesddukel-iten
Aṭṭas aya i ferqen kulwa s wedrar-is
D acengu iten-iferqen amzun d aklan-is
Netta bxiṛ nutni bedden i laẓ d wegris
Xas akken lluẓen d imawlan n nnif
Arumi ikreh-iten serwan-as lḥif
Muqrani* deg Igerger Abdelkrim di Rif*

Nesla s imaziɣen mi msawalen
Begset ay atmaten a nennaɣet irumyen
Tamurt nneɣ aɛzizen erran-tt d ayla-nsen
Sebɛasnin d amerẓi yeḍra uxessar
Awris meskin yeɣli Warsenis yenṭer
Idammen d leḥmali i yuzlen di Ǧerǧer.
Aɛraven imiren qqaren-as « wacbihum »
Kra deg-sen nnuɣen yebbweḍ-iten unezgum
Aṭṭas af yedrimen guǧan ar « lgum »*.

Nesla s imaziɣen mi msawalen
Cfut ay atmaten af aɛraven
Ad iffeɣ urumi ad d-nelhut yid-sen
Akken tefra lgira ḥerran-d asawen
Aɣyul n Ben Bella yerra-d aciwen
I leqvaylel yufa wid yuɣ s ibawen
Ṭṭfen tamurt nneɣ cudden-tt ar Mekka
I wid ur neqvil lla qqazen aẓekka
Ufan abrid deg-neɣ neččur d lḥerka*

Nesla s imaziɣen mi msawalen
Cfut ay atmaten af ixannaven*
Akken i teḍra d waɛrav a tteḍru yid-sen
Bɣan aɣ-rren d nutni aɣ-beddelen isem
a nessiwel s tɛaravt neɣ a neggugem
Akka i iḍebber Lmulud Qasem*
Xerrubi* d Maẓuẓi* ula d nutni nzan
Am zik ar It Ali atnan truzan
Win yuɣal d arumi wigi d ibẓiẓen

Amawal:
Lgum: engagés supplétifs dans l’armée française
lḥerka: plur de harki
ixannaven: traitres
Lmulud Qasem: kabyle de service sous Boukharouba dans les années 70. Il fut ministre des Mosquées.
Xerrubi: prefet puis ministre de l’enseignement avec Chadli B.
Maẓuẓi: ministre de finance dans les années 70
tatɛarvit: arabisation

Lemɛani n dunnit
Xerrubi d netta is-yennan i Bumedyen: « Efk-iyi Tizi Wezzu, qrad iseggasen kan a tt-rreɣ ttaɛravt ». Nnan-as diɣen ineɣmasen ifransisen n libération: « Amek ara terigliḍ taluft agi n « tatɛarvit » ? Irra-asen: « Asmi ara d-awḍen warrac deg uɣervaz ur ttemsefhamen ara d imawlan-nsen, ass-n tefra temsalt ».

UA-10888605-2