23 juin 2017

Tilleli n teqbaylit seld timanit

Nettmeslay aṭas tagara-ya ɤef uzekka n tmurt n Leqbayel : amek ara yelli yimal-is asertan, aniwa anagraw asertan ara yernun fell-as…imi ula d temlilit n wass-a ɤef wanect-a itt-id-teswejdem. Maca nek sḥasfeɤ seg zik ɤef wazal d umkan i d -isaḥen i temeṭṭut taqbaylit deg wayen akk i tennam ara ass-a ! Yerna d wa i d llez-iw ameqqran, ur nezmir ara ad nemmeslay ɤef timanit n tmurt n leqbayel seld ad nemmeslay ɤef tmeṭṭut taqbaylit. D tidet-nwen yeεni, tella tmurt ara ibedden ma ur beddent ara tlawin-is ? Tezmer ad teğğuğeg tmurt n Leqbayel mebla tiqbayliyin ?Retour ligne automatique
Ihi ur cukteɤ ara ad llin gar-nneɤ, xersum ass-a, wid ara d-yinin ih. Imi ulac win ara inekren azal n tmeṭṭut taqbaylit deg umezruy : ama amnuɤ-is mgal acengu, amnuɤ-is ɤef tlelliyin neɤ ɤef tmaziɤt…Ulac win izemren ad yettu amezruy n Faḍma n Sumer neɤ win n twacult Iεemrucen (Faḍma d Ṭawes) d tiyaḍ.

Γas akka, tella tidet s wayes ara nzux deg umezruy, maεna ur ilaq ara ad nessderɤel iman-nneɤ ɤef tidet nniḍen n umezruy, tin i daɤ-yesqraḥen. Neẓra akk, seg zik tamurt n leqbayel tessedaw tilufa-s s tugdut maca ur nettaf ara tameṭṭut tekki deg tejmaεit n taddart. Γas akken Bulifa ur yeqbil ara tamuɤli d rray n Hantoux ɤef tmeṭṭut taqbaylit, maca yella wayen yellan d tidet.

Nek tamezwarut, ttwaliɤ akken isfek ɤef yimaɤnasen n timanit n tmurt n leqbayel, ad sεun aṭas n tebɤest akken ad d-nmeslay ɤef tilawt n ṭmeṭṭut taqbaylit. Ma yella nḥemmel ad nzux s tid i yernan deg ccan n tmurt leqbayel, ur ilaq ara ad nettsetḥi neɤ ad nerr deg ṭṭerf, tid ur tesaweḍ ara xersum imira tamurt n leqbayel ad asent-tsibnin tudert.

Tis snat, xas akken tameṭṭut n wass-a tettban-d d tin yekksen aṭas n lmiḥyaf ɤef yiman-is, mačči am tid n zik : ur tezmir ara ad tɤer almi d anida i d as-yehwa, ur tezmir ara ad tezweğ d win tebɤa neɤ melmi i tebɤa, maca, ula d tid n wass-a yeṭṭafer-itent lmiḥyaf imi aṭas n tlufa i yellan maεlic ɤef yergazen yerna s isaɤ tent-xedmen, ma ɤef tlawin geldent, yerna mačči d isaɤ. Imi akka tettwalim tilawin nwassa, laqedcent deg myal aḥric n lxedmaffɤent, ɤrant : d tiselmadin uɤerbaz,timjayin,tinaɤmasin, maca d tid iḍerfen iman-nsent ɤef tsartit,amzun akken walant mačči d ayen yesεan azal,imi d ayen yellan yakan deg tefrit- nsent, ttwalint, d ahric icuden kan ɤer yergazen i yerna irgazen yellan d imaɤnasen ur εriḍen ara, neɤ nezmer ad d-ninni ur sawḍen ara tent-id- suffɤent deg tmuɤli-ya-nsent yecḍen.

Ansa id-tekka takti-ya ? Nek, zemreɤ adiniɤ seg ttrebga i yasent -ittunefken seg temẓi nsent, ladɤa ttrebga i tettak tyemmat taqbylit i yelli-s. Imi ad naf tayemmat, tin yettwessin yalass ad telli yelli-s d tin ara yeqqimen daw laεnaya nwargaz : ama d baba-s ama d gmas,neɤ d argaz-is neɤ sumata wid i yas-id-iḍewren. Dɤa tuɤal dtakti yeẓẓan deg walaɤen am waken ẓẓan iẓuran n tzemrin deg wakal ; icuba am wakken tguni fell-nnteɤ ad netbeε aya s tid n tura. Yuɤal d lεib, ma neffeɤ-d seg ttxamim-a, negguma ad nreẓ yir leqyud i daɤ yurzen. Yusa-d am wakken ẓẓay fell-aɤ ; awi-d kan ad nedduri,nseqnaε s wemḍiq i yaɤ-yettunefken neɤ amḍiq id-nufa.Ass-a adnaf wid icennun tilelli n tmeṭṭut,cnun-tt deg yilem tid-nsent ḥejben-tent cedhant aḍu n tlelli, wid yessawalen izrfan n tmeṭṭut wid n tid-nsent rekḍen-tent. Maca aya ur yelli ara kan d lebɤi n wargaz neɤ n tmurt waḥed-s, ula d nkenti s tlawin nettekka deg wayen i daɤ-yuɤen nezga nefcel, nugad, nsurref… D nekkenti i yasen-ismesden ajenwi i wid i daɤ-igezmen amrar n tlelli-nteɤ. Tin yeɤran tettu tin ur neɤri, tin yettwargmen tettu tin yettwawten, tin yeffɤen tettu tin iɤef wumi rran leswar, nezga d tingura ɤer rrbaḥ xas ma nella d timezwura ɤer umdeggar.

Ihi ilaq ad nesfezwi ɤef yiman-nnteɤ, yewwi-d ad aɤ-d-yawi umeddaḥ deg teqsiṭ, ilaq ad nemmeslay nekkenti tid idaɤ-iqerḥen, ilaq ad nessali iṭij-nnteɤ, ad nessğğuğeg tudert-nnteɤ, ur nettrağu ara tasarut ɤer wiyaḍ, yella wanida ilaq ad nezdi d yergazen maca ilaq ad neskker kra n leqdic iman-nnteɤ.

Par Souad BELLA

Article publié pour la première fois le 5 juin 2013

UA-10888605-2