23 avril 2017

Uccen, taɣaṭ d warraw-is

Yiwet n tikkelt, yemlal-d wuccen ak d sin iqelwacen teddun s axxam. Izwer-asen a ten-yečč, yesseqsa amezwaru :
– D acu i d-tewwiḍ ɣef tqerruyt-ik ? Irra-as s tuggti d tergagayt :
– D tacciwin
– D acu ɣef tγeddeḍ ?
– Γef tqejjirin-iw
– Acuɣer akka i tettergigiḍ ?
– Ugadeɣ ad iyi-teččeḍ.

Uccen yefreḥ imi axṣim* yugad. Cwiṭ akka a t-an tessawḍ-d yemmat-sen. Terra arraw-is ɣer deffir u teqqubel axṣim*. Inna wuccen :
– D aci i d-tewwiḍ ɣef uqerruy-im ?
– D isfuden* s ara k-fetkeɣ*
– D acu ɣef tbeddeḍ ?
– D tidebbuzin* s ara k-ddzeɣ
– Acuɣer tettergigiḍ* ihi ?
– Ḥareɣ milmi ara k-fetkeɣ

Tebda taɣaṭ tettaẓ ar zzat-s. Uccen yettuɣal ar deffir si tuggdi. Imuqel akin, akka, yeṭṭef abrid d tarewla.

*D wagi i d awalen ineggura i s ara tfakem tamacahutt-nwen zzat n tarwa-nwen lawan n tguni : « Tamacahutt-iw tura tfutk ! Nekni a neddu abrid, abrid. Uccen ad iruh ahriq, ahriq. Nekn i aɣ-yaɛfu Ṛebbi. Uccen a t-yexdaɛ Ṛebbi ».

Amawal :
axṣim : adversaire
isfuden : tisons
fetkeɣ, ftek : éventrer
Cwiṭ, ciṭṭuḥ : peu, pas beaucoup.
tidebbuzin : gourdins. (adebbuz : le coup de poing).
tettergigiḍ : tu trembles. (Targagit : la tremblotte). Tekcem-ik tergagit zzat n lmut.