23 avril 2017

Yal ccedda tetabaɛ-tt talwit (VIII)

Dɣa laɛtab n Ḥend yenṭeq-d, yerra-as-d, yenna :
– Ayen iɛeddan iruḥ, iruḥ ur d-yettuɣal, yeǧǧa-d ul-iw d amejruḥ, tiqdimin ad am-tent-id-yessekfal deg ddunit, tecbiḍ win yenɣan rruḥ, amek ara tqableḍ akal (01).
S waya mi i d-tuki tufa-d iman-is yeffeɣ-itt laɛqel tesleb*. Imiren tettsuɣu*, tettazzal deg izenqan, lɣaci behbbhan. Γef anecta, gren-d iman-nsen ssrabes* n laman anda itt-jemɛen ɣer sbiṭar n imehbal*. Axxam yegra-d i Badriya weḥd-s anida i as-d-tusa tikti* ad d-tesgaǧ* ɣur-s tawacult-is.

Gaya akken i t-id-yewweḍ usal*, yefren ad yuɣal ɣer tmurt i wakken ad yili d axalaf n wayen i d-ɣeǧǧa Aɛmer akken Ḥend*. Gaya yewweḍ-d s axxam yesuffeɣ Badriya anda i d-yerra Ferruǧa akked Tninna. Gaya yellan iḥemmel aṭṭas Taninna yessaram ad yecrek tudert-is yid-s, yufa-d iman-is yewweḍ ɣer lebɣi-s. Taninna i yellan tuḍen seg wayen akk i as-yeḍran imi d-teffeɣ seg uxxam-nni i tt-yezdeɣ lxuf akked lweḥec tufa-d iman-is deg tezmert igerrezen, tenna :

– Win yebɣan ddwa i waṭṭan-is yeṭṭef deg Ṛebbi* (02), ay amuḍin ur ttayes ma ur tumineḍ steqsi-yi-d nekkini ur as-qqar d lhedra n yiles ur as-qqar d ayen ur nelli, nekk ad ak-d-ḥkuɣ ma d kečč ḥesses ad teẓreḍ i yeḍran yid-i d iseggasen (03) kecmeɣ deg tmest*, lmeḥna tesseḥmay ɣur-i, yezga wul-iw yuyes tafat n temẓi-w texsi (04), iɛedda acḥal d aseggas, leswar zzin-iyi, yeɛdel fell-i yiḍ d wass tweḥḥceɣ deg uzal qayli*, taqella deg imi-w d amessas, tezga ṣṣura-w teɣli lmeḥna d illel* n ccfawat* qabel-itt s d udrar n ṣṣber. Yiwen wass ad ak-d-tban tafat, iṭij ɣur- ad yedher, ulac ugur ur nesɛi tifrat, Ṛebbi akken yettruẓu i ijebber.

Ma d Ferruǧǧa i wumi i yeffeɣ laɛtab ɣer tafat (05) mi d-tuɣal ɣer uxxam n urgaz-is, tenna :
– A win ijebbden amrar, ixef-is atan da ɣur-i, d nekk i d yemma-s n ṣṣber, d nekk i d-rebbant lemḥani, d nekk i yelsan abernus n sser, anda ddiɣ yeṣṣer-iyi, d nekk i izedɣen adrar, iɛessasen-is ḥurben* fell-i.
Tagara.

Amawal :
tesleb : folle. tiselbi : folie.
tettsuɣu : hurle : v. hurler
ssrabes : services. n masc plur. Yusa-d seg tefransist « les services ». Nezmer ad d-nini diɣen « iḥersiwen » i d-yusan deg lḥers (oppression).
sbiṭar n imehbal : hôpital psychiatrique.
tesgaǧ : v. agaǧi (ici dans le sens de faire déplace qqn, changer de lieu). Zik qqaren : iguǧa ar lɛesker (il s’est engagé dans l’armée).
Usal : n masc sing. Nouvelle, information. Wwḍen-d isalen n tmurt. Ad isal Ṛebbis lxir ! (awal agi ula d izukar qqaren-t s tegnawit-nsen, maca ttakerḍa iɣ-tukren).
Ḥend (Aḥmed) : prénom masc. kabylisé.
Ṛebbi : Dieu kabyle. Allah est celui des Arabes.
deg uzal qayli : en plein jour. Imi ara yili yiṭij deg tlemmast n igenni (à midi). Dagi nezmer ad d-nekkes awal uqeggel. Awal agi mara yekk umeksa ass s lkeml-is deg lexla. « Ass-a, iqeggel Dda Mḥend deg teɣzut-is ».
times, timest : n fem sing. Awal agi ilaq as ad yettwaru s « t » ar tagara-ines.
illel : n masc sing. lebḥar s tegnawit is-qqaren.
ccfawat : n masc plur. Mémoires, souvenirs, (ccfawat n temẓi).

Lemɛani n ddunit :
01) Dagi d amdan yumnen tella tudert nniḍen mara yemmet, yekcem ara ddaw n wakal. Wagi d i yinselmen kan, acku ar imasiḥen nutni ar igenwan (lɛarc reḥman) iyettali rruḥ-nsen. Ihi ar inselmen, nutni amdan assen mara yesɛaddi iḍ-is amenzu-s deg uẓekka, ad d-yas ar ɣur-s ɛazrayen aqvayli a t-ibeḥḥet af ayen akk i yexdem deg tudert ines. Ma ala ccer neɣ d ayen n diri kan i yexdem, imiren ɛazrayen aqvayli a t-yeddez s uzduz is. Akka i d-ḥekkun wid yeqqaren ddin yal ass. Maca ulac win yemmuten yuɣalen seg asmi d tebda ddunit ara ass-a. Tiki merra d timucuha ara yessigwden igerdan.

02) Ayagi diɣen d imeslayen i yzedɣen yal aqvayli i yumnen s ddin ineslem. Maca ilaq Iqvayliyen n wass-a ad amnen s wayen ttwalin, s wayen i yezmer umdan n tudert ad yesbeggen belli taɣawsa nni dayen yellan s tidet-is. Ayagi d ayen yeqqenen ara yettwaɛeyyenen, ara d-yettwabeggenen zzat n wallen neɣ timeɣẓent.

03) Dagi d amdan i isɛaddan lḥif meqqren.
04) Dagi d ussan yelhan i d tafat n temẓi. Kra n wayen yelhan, icebḥen ttmetilen-t medden ar wayen igerrezen, ila deg-s usirem n uzekka.
05) Mara yili yiwen umdan yewweḍ ar lebɣi-s, ar wayen yessaram.

Expression du jour :
Leflani am tbekkitt, ur d-tettak ayefki, ur d-tettak taduṭ. (telle une guenon qui ne produit ni le lait, ni la laine).

Amedya yagi qqaren-t medden i win anda ulac kra n wayen yelhan ara k-id-asen ɣur-s. D amdan itetten deg lfayda, ulac kra n wayel igerrezen seg tama-s n lxir.